पोखरा-नेपाल खेलकुद पत्रकार मञ्च कास्कीले कार्यसमिति सदस्य नारायण शाहीको उपचारार्थ दश हजार सहयोग प्रदान गरेको छ । मञ्चको शुक्रबार बसेको बैठकले स्वास्थ्योपचार गरिरहेका शाहीलाई सो रकम प्रदान गरेको हो । मञ्चका सल्लाहकार समेत रहेका पश्चिमाञ्चल क्षेत्रीय खेलकुद विकास समितिका अध्यक्ष खगराज पौडेल र मञ्चका अध्यक्ष केशव पाठकले सो रकम बराबरको चेक शाहीलाई हस्तान्तरण गरे ।
गत मंसिर २२ गते पोखरा रामबजारमा मोटरसाईकल दुर्घटनामा परेका शाहीको दाहिने हातको पाखुर रा कुममा भित्री चोट लागेको थियो । उनको माघ ४ गते शल्यक्रिया समेत गरिएको थियो । अहिले शाही फिजियोथेरापी गराईरहेका छन् । मञ्चका अध्यक्ष पाठकले आफ्नो परिवारका सदस्य बिरामी भएकाले मञ्चको सानो सहयोग भन्दै मञ्चका तर्फबाट शीघ्र स्वास्थ्यलाभको कामना गरेका थिए ।
यसैबीच, मञ्चको शुक्रबारको बैठकले आह्वान गरेअनुरुप प्राप्त नयाँ सदस्यता आवेदनकर्तामध्ये योग्य पत्रकारलाई अनुमोदन गरेको छ । खेलकुद पत्रकार मञ्चमा १५ जना नयाँ सदस्य थप भएका छन् ।
सदस्यता पाउनेहरुमा आदर्शसमाज दैनिकका दुर्गाप्रसाद पौडेल, पोखरान्युज डटकमका ढाकामोहन बराल, सुनौलो पब्लिकेशनका राजाराम पौडेल, आर्थिक आवाजका सुरेन्द्र पौडेल, गोल्डेन न्युज टिभीका प्रभु अधिकारी, पोखरा टेलिभिजनका रोशन अधिकारी, रेडियो बाराहीका शशी पौडेल, मेघा एफएमका गौरव त्रिपाठी, माछापुच्छ«े एफएमका कविता घर्ती मगर, रेडियो अन्नपूर्णका उमा आले मगर, पोखरा हटलाईनका गणेश पौडेल, जक्शन डटकमका युवराज गुरुङ, कमाण्डर पोष्टका नरहरि पौड्याल, रेडियो जननीका क्षमता खड्का र आदर्श नेपाल दैनिकका राजु गिरीको आवेदन स्वीकृत गरिएको सचिव रञ्जन अधिकारीले जानकारी दिए । नयाँ १५ जना सहित मञ्चमा आबद्ध पत्रकारको संख्या ५६ पुगेको छ । वार्षिक नविकरण गर्नुपर्ने निर्णय समेत मञ्चको यसअघि बैठकले गरिसकेको छ ।
