काठमाडौं । गैरआवासीय नेपाली संघ (एनआरएन)ले भुकम्प पिडितहरुका लागी गोरखाको लाप्राकका बनाउन लागेको एकीकृत नमूना वस्तीको शुक्रबार प्रधानमन्त्री पुष्पकमल दाहाल प्रचण्डले शिलान्यास गरेका छन् ।
एनआरएनले गतबर्ष वैशाखमा गएको महाभूकम्पबाट घरबारविहीन भएकाहरुका लागि सम्पूर्ण सुविधायुक्त एक हजार नमूना घर बनाइदिने घोषणा गरेको थियो । त्यसका लागि ३५ करोड रुपैयाँ खर्च हुने अनुमान छ ।
एनआरएनको गुरुयोजना अनुसार लाप्राकको गुन्सीपाखामा सुविधायुक्त ४४४ घरको नमूना बस्ती बनाइने छ र त्यहाँ लाप्राकका भूकम्प पीडितहरुलाई पुनर्बास गराइने छ । एनआरएनले ६१२ घर बनाउन चाहेको छ । तर, जग्गा अपुग भएकाले अहिले ४४४ बन्नेछ भने बाँकी १५० घरका लागि नयाँ ठाउँ खोजिनेछ ।
एनआरएनले देखाएको राष्ट्रिय भावना सबैका लागि प्रेरणादायी रहेको भन्दै उनले ‘एनआरएनले खतरा मोलेको छ, जोखिम मोलेको छ । शेष घलेजीको परिचय त्यसै बनेको होइन । उहाँले आँटेपछि काम पुरा गर्नुहुन्छ भन्ने विश्वास छ ।’
मूख्य सचिव डा. सोमलाल सुवेदीले वस्ती निर्माणको गुरुयोजना स्वागतयोग्य रहेको भन्दै कुनै समस्या भए साझेदारी गर्न सरकार तयार रहेको बताए ।
एनआरएनका अध्यक्ष शेष घलेले प्रधानमन्त्रीको सम्बोधनले आफूहरुलाई ढुक्क बनाएको भन्दै १२ महिनाभित्र लाप्राकबासीलाई नयाँ घरमा सार्ने प्रतिवद्धता व्यक्त गरे । एकीकृत बस्ती प्राकृतिक र भौगोलिक संरचना, वातावरण नबिग्रने गरी स्थानीय सामाग्रीको प्रयोगद्धारा निर्माण गरिने घलेले जानकारी दिए ।
अध्यक्ष घलेका अनुसार नमूना बस्तीमा गैरआवासीय नेपाली संघले ४४४ घर आधुनिक घर निर्माण गर्नेछ । एकीकृत बस्तीमा विद्यालय, स्वास्थ्य संस्था, सामुदायिक भवन, स्थानीय जाति, जनजातिको भेषभुषा, संस्कृति र रहनसहन झल्कने एवं प्राकृतिक स्वरुप कायम हुने खालका घरहरुमा बनाइनेछ ।
एकीकृत वस्तीमा बन्ने संग्रहालयमा पानी घट्ट, जाँतो, ढिकी, लाइभ प्रोग्राम देखाउन मिल्ने हल, परम्परागत बस्तु र संस्कारबारे सामग्री, मन्दिर, देवल पनि हुनेछन् । साथै सोलार इनर्जी, अपांगमैत्री संरचना हुनेछन् ।
बस्तीमा होमस्टे, सामुदायिक गेष्ट हाउस समेत निर्माण गरी व्यक्तिगत र संस्थागत आम्दानीको स्रोत जुटाइने संघका अध्यक्ष घलेले बताए । घर निर्माणका लागि प्रतिघर ९ देखि १० लाख लागत लाग्ने छ ।
