काठमाडौं /
चिरप्रतिद्वन्द्वी रियल मड्रिडलाई पन्छाउँदै एथ्लेटिको मड्रिड स्पेनिस कोपा डेल रे फुटबलको क्वार्टरफाइनलमा प्रवेश गरेको छ ।
बिहीबार राति भएको मड्रिड डर्बी २–२ को बराबरीमा सकिएपछि एथ्लेटिको समग्रमा ४–२ को जितका साथ अन्तिम आठमा पुगेको हो । अब एथ्लेटिको मड्रिडले अघिल्लो चरण प्रवेशका लागि बार्सिलोनासँग खेल्नेछ ।
खेलमा एथ्लेटिको मड्रिडले पहिलो मिनेटमा नै फर्नान्डो टोरेसको गोलबाट अग्रता लियो । एथ्लेटिको फर्किएपछि टोरेसको यो पहिलो गोल हो ।
खेलको २० औं मिनेटमा सर्जिओ रामोसले रियल मड्रिडका लागि बराबरी गोल फर्काए । दोस्रो हाफको सुरुमा नै टोरेसले गोल गर्दै एथ्लेटिको मड्रिडलाई फेरि अग्रता दिलाए ।
खेलको ५४ औं मिनेटमा क्रिष्टियानो रोनाल्डोले बराबरी गोल फर्काए । रोनाल्डोको हेड गोलपछि पनि अघिल्लो चरण प्रवेश गर्न थप तीन चाहिन्थ्यो । तर, खेलमा थप गोल हुन सकेन र समग्रमा एथ्लेटिको मड्रिड ४–२ ले विजयी भयो ।
