प्रकाश ढकाल
कोपनहेगन । सरकारले हालै एक्काइस देशको लागि एकै पटक राजदुतहरु सिफारिस गर्दा डेनमार्कको लागि पनि गरेको छ । सरकारले सिफारिस गरेका डेनमार्कको लागि नयाँ राजदुतमा युव नाथ लम्साल रहेका छन् । उनी पेशाले पत्रकार पनि हुन् र हाल ‘द राइजिङ्ग नेपाल’का सम्पादक पनि हुन् ।
पर्वत स्थायी घर भएका लम्साल माओवादी कोटाबाट राजदुत बन्न लागेको स्रोतले बताएको छ । हाल प्रचण्डको नजिकका मानिएका लंसाल कुनै समय एमाले समर्थक पत्रकार हरुको संस्था प्रेस चौतारीका संस्थापक महासचिव पनि हुन् ।
तस्वीरमा राजदुतमा सिफारिस परेका लम्साल
राजदुतमा सिफारिस परे पनि राजदुत नियुक्त हुन अझै केहि समय लाग्ने देखिएको छ । संसदीय सुनुवाई हुन समय लाग्ने र सो भइसकेपछि नेपाल सरकारले स्विकृतीको लागि डेनिस सरकार समक्ष अग्रिमो पठाउने र अग्रिमो स्विकृती भएर आएपछि बल्ल सरकारले नियुक्त गरेर डेनमार्क पठाउने छ ।
