भाद्र २७,पोखरा
पोखराको टुडिखेलस्थित सम्झौता युवा क्लव र इन्द्रेणी एकीकृत विकास केन्द्रको संयुक्त आयोजनामा असोजको पहिलो साता हुन लागेको तीस वर्ष नाघेकाहरुको सेभेन ए साइड फुटवल प्रतियोगिताको तयारी तिब्र पारिएको छ ।
‘नागरिक स्वास्थ्यका लागि खेलकुद’ नारा सहित आयोजना हुन लागेको उक्त प्रतियोगितामा प्रथम हुने समुहले नगद ३५ हजार सहित शिल्ड मेडल प्रमाणपत्र तथा द्वितिय हुने समुहले नगद २० हजार सहित शिल्ड मेडल प्रमाणपत्र पुरस्कार प्राप्त गर्ने प्रतियोगिता संयोजक विनोद गुरुङ्गले जानकारी दिए । पहिलो चरणका खेलहरु २०–२० मिनेट तथा क्वाटरफाइनलदेखि २५–२५ मिनेट खेलाइने प्रतियोगितामा क्वाटरफाइनलदेखिका हरेक खेलहरुमा म्यान अफ द म्याचलाई पनि पुरस्कृत गरिने छ ।
त्यसैगरि सर्वोत्कृष्ट खेलाडी,उत्कृष्ट डिफेण्डर,उत्कृष्ट फरवार्ड र उत्कृष्ट गोलकिपरलाईपनि विशेष पुरस्कार प्रदान गरिने आयोजक समितिले जनाएको छ । प्रतियोगितामा भाग लिन यहि भाद्र ३१ गते सम्म पुरानो टुडिखेलमा सम्पर्क गर्न सकिने हिटलर घलेले बताए ।
