लण्डन- कोरोना भाइरस महामारीबाट प्रभावित देशहरुमा गैरआवासीय नेपाली संघ (एनआरएनए) ले राहत वितरणलाई तिब्रता दिएको छ। समस्यामा परेका विद्यार्थीहरु,काम गुमाएका नेपालीहरुलाई लक्षित गर्दै संघले राहत बितरणलाई तिब्रता दिएको हो।
कतिपय मुलुकहरुमा ‘कोभिड-१९’ ले प्रभावित परिवारका सदस्यहरुलाई खाद्यसामग्री पुर्याएर संघले सहयोग गरेको छ। गैरआवासीय नेपाली संघ (एनआरएनए) का अध्यक्ष तथा ‘कोभिड १९’ उच्चस्तरीय समितिका संयोजक कुमार पन्तका अनुसार डेढ दर्जनभन्दा बढी राष्ट्रिय समन्वय परिषदहरु सक्रिय भईसकेको बताए।
अध्यक्ष पन्तले भने,”यो बेला भनेको एकले अर्कोलाई सहयोग गर्ने बेला हो। मलाई आशा छ ८० भन्दा बढी शाखाहरुका साथीहरुनै सहयोगी अभियानमा लाग्नुहुनेछ।“तत्कालका लागि न्युनतम आबश्यकता पुरा गर्न एकले अर्कोलाई सहयोग गर्नु नै अहिलेको प्राथमिकता भएको अध्यक्ष पन्तले बताए।
एनआरएनए अष्ट्रेलियाले ३ सय ९० जना विद्यार्थीहरुलाई राहत बितरण गरिसकेको छ। संघका महासचिव ज्ञानेन्द्र रेग्मीका अनुसार दाल, चामल, चिनी लगायत दैनिक खाद्यान्न खरिद सामग्रीहरु खरिदमा संघले २० हजार डलर खर्च गरिसकेको छ। “१ हजार १ सय भन्दा बढी नेपालीहरुले फाराम भरेर राहतको माग गर्नुभएको छ। हामीले ५० हजार डलरको राहत कोष बनाएर राहत बितरणलाई तिब्र पार्दै छौ” महासचिव रेग्मीले भने।
एनआरएनए अमेरिकाले करिब ४ सय जना विद्यार्थीहरुलाई राहत बितरण गरिसकेको छ। संघका अध्यक्ष सुनिल शाहका अनुसार उनीहरुलाई दाल, चामल, पिठो, चिनी लगायत दैनिक खाद्यान्न खरिद सामग्रीहरु वितरण गरिएको हो। “ भौतिक सामग्री लगायत दैनिक टेलिफोन सेवा पनि संघले उपलव्ध गराएको छ। पछिल्लो दुई सातमा करिब २ हजार नेपाली कानूनी तथा जनचेतना कार्यक्रमबाट लाभान्दित भएका छन्” अध्यक्ष शाहले भने।
एनआरएनए अमेरिकाले १४ हजार डलर आर्थिक संकलन गरेको छ। यस्तै अफ्रिका क्षेत्रमा रहेका नेपालीहरुले समेत राहत संकलन शुरु गरेका छन्। संघका पूर्व कोषाध्यक्ष हिक्मत थापाका अनुसार त्यहाँ रहेका नेपालीहरुले एनआरएनए अफ्रिका क्षेत्रीय कोषको स्थापना गरेर काम अघि बढाएका छन्। हालसम्म सो कोषमा १० हजार डलर जम्मा भएको छ।
साईप्रसमा ५ देखि ७ हजार विद्यार्थीहरु समस्यामा परेपछि एनआरएनए साईप्रसले घर-घरमै राहत पुर्याउने ब्यबस्था गरेको छ। संघका प्रबक्ता दिनेश गौतमका अनुसार ४ सय ५६ जना बिद्यार्थीहरुले राहत पाईसकेका छन्। त्यहाँ अध्ययनरत विद्यार्थीहरुले आँफूहरु नेपाल फर्कन चाहेको ईच्छा ब्यक्त गर्दै नेपाली राजदूतावास इजरायलमार्फत नेपाल सरकारलाई घर फर्काउन अनुरोध समेत गरेकाछन्।
गैरआवासीय नेपाली संघ यूएईले वैदेशिक रोजगारीमा अलपत्रमा परेका नेपालीहरुको लागि राहत वितरणलाई तिब्रता दिएको छ । संघका अध्यक्ष प्रकाश कोराइराका अनुसार गत सातादेखि हालसम्म १ हजार जना नेपालीहरुलाई राहत वितरण गरिएको जानकारी दिए। यस्तै गैरआवासीय नेपाली संघ कतारले तीन सय भन्दा बढी कोरोना पीडितलाई राहत वितरण गरेको संघले जनाएको छ।
एनआरएनए स्पेनले १ सय ६७ जना,पोर्चुगलले १ सय ३३ जना, इटालीले २० जना नेपालीहरुलाई राहत बितरण गरिसकेको छ। फ्रान्स, अष्ट्रिया, बहराइन, साउदी अरब, क्यानाडा, अमेरिका, हङ्गकंङ्ग लगायतका देशहरुमा राहत वितरण कार्य सुरु भईसकेका छन्। प्रारम्भिक रिपोर्ट अनुसार हालसम्म करिब ३ हजार गैर आबासीय नेपालीहरुले राहत प्राप्त गरेका छन्। तर एक हप्तापछि ठूलो संख्यामा नेपालीहरुले राहत प्राप्त गर्ने संघले अपेक्षा राखेको छ।
यसअघि दक्षिण कोरिया र हङ्गकङ्ग, अष्ट्रेलिया लगायतका देशहरुले स्वास्थ्य सामग्री समेत वितरण गरेका थिए। एनआरएनएले दक्षिण कोरियाले गत हप्तमा मार्फत १ करोड ६० लाख बराबरको स्वास्थ्य सम्वन्धी सामग्री नेपाल पठाएको थियो भने अन्य देशहरुले त्यहाँ स्थित नेपाली समुदायलाई स्यानिटाइजर, माक्स, थर्ममिटर वितरण गरेका छन्।
