पोखरा –जन आन्दोलन सहिद परिवार तथा घाइते समन्वय समिति कास्कीको चौथो अधिवेशन शनिबार सम्पन्न भएको छ । अधिवेशनले आगामी २ वर्षे कार्यकालको लागि शेखर गौतमको अध्यक्षतामा नयाँ कार्य समिति चयन भएको छ ।
समितिको उपाध्यक्षमा नारायण सुवेदी, सचिवमा विजया सुवेदी, सहसचिवमा गंगाधर बराल र कोषाध्यक्षमा शंकर पौडेल रहेका छन । कार्य समितिको सदस्यहरुमा गिता के सि , भिम नेपाली ,उमादेवी बास्तोला, सुर्यदेवी बञ्जरा र समुन्द्र सुनार रहेका छन । अधिवेशन तथा साधारण सभाले २०५९ माघ १९ गते पछिको प्रतिगमन विरुद्धको आन्दोलनको क्रममा घाइते भएका तथा सहिदका परिवारलाई समेत समावेश गर्ने गरी विधानको संशोधन गरेको छ ।
गण्डकी प्रदेशका सामाजिक विकास मन्त्री नरदेवी पुनमगरले अधिवेशनको उद्घाटन गर्दै प्रदेश सरकारले जन आन्दोलनका घाइतेहरुका सवाललाई आर्थिक वर्ष २०७६÷०७७को बजेटमा सम्बोधन गर्ने बताइन् । ‘चालु आर्थिक वर्षको बजेट बनाउदा प्रयाप्त छलफल गर्न सकिएन, ’मन्त्री पुनले भनिन्, ‘अहिलेको बजेटमा कुनै किसिमको सम्बोधन गर्न सकिएन । आगामी बजेट निर्माण गर्दा ख्याल गरिने छ ।’ जन आन्दोलनका घाइते तथा सहिदका परिवारलाई प्राविधिक शिक्षा तथा व्यवसायी तालिम परिषद (सीटीईभीटी )मार्फत तालिमको व्यवस्था गरी स्वरोजगार बनाउन ध्यान दिने उल्लेख गर्दै मन्त्री पुनले उद्यमी बन्न असहजता भए मन्त्रालयले सहजीकरण गर्ने बताइन् । नेपाली कांग्रेस कास्कीका सभापति कृष्ण केसीले विगतमा दलहरु विभाजित भएको भए राजा फाल्न नसकिने बताए । शान्ति र समृद्धिको एजेण्डालाई पुरा गर्न सत्तामा रहने पाटी सवभन्दा बढी जिम्मेवार बन्न पर्ने दावी गर्दै सभापति केसीले सरकार अभिभावक बनेर सबैलाई समेट्न पर्ने तर्क गरे । कार्यक्रममा राष्ट्रिय मानव अधिकार आयोगका उपनिर्देशक नितु गर्तौला, अग्रज मानव अधिकारकर्मी टेकनाथ बराल, शान्तिको लागि नागरिक समाजको सञ्जाल पोखराका संयोजक विष्णुप्रसाद बराल, सहिद भीमसेन दाहालकी पत्नी सविता दाहाल, महिला मानव अधिकार रक्षक सञ्जाल कास्कीका अध्यक्ष जानकी शर्मा, वेपत्ता योद्धा समाज कास्कीका अध्यक्ष अणनाथ बराल, जनआन्दोलन सहिद परिवार तथा घाइते समन्वय समिति कास्कीका निवर्तमान अध्यक्ष ढाकाराम पौडेल, इन्सेकका गण्डकी प्रदेश संयोजक शिव खकुरेल, एड्भोकेसी फोरम पोखराका संयोजक सरलाकुमारी पाण्डे लगायतले मन्तव्य राखेका थिए ।
