माधव बराल
पोखरा, २५ साउन
कल्याण शेरचन स्मृति प्रतिष्ठान पोखराको आज भएको दोस्रो अधिवेशनले पूनः क्याप्टेन पूर्णबहादुर गुरुङ ह्योल्मोको अध्यक्षतामा १३ सदस्यीय नयाँ कार्यसमिति चयन गरेको छ । समितिको उपाध्यक्षमा ज्ञानबहादुर थापा, सचिवमा सृजन गुरुङ, सहसचिवमा डिबी नेपाली, कोषाध्यक्षमा प्रदीप गौचन रहनुभएको छ ।
समितिको सदस्यमा कमल गुरुङ, अशोक शेरचन, तेज केसी, जगबहादुर गुरुङ, गजेन्द्र गौचन, धर्मा गुरुङ, ईश्वरी थापा र शुशीला गुरुङ रहनुभएको निर्वाचन अधिकृत तथा पोखरा उपमहानगर पालिकाका कानुन अधिकृत नारायणप्रसाद शर्माले जानकारी दिनुभयो ।
यसअघि अधिवेशनको उद्घाटन गर्दै पूर्व क्षेत्रीय शिक्षा निर्देशक योगेन्द्रबहादुर बस्नेतले कल्याण शेरचनले देखाएको बोटालाई नयाँ पुस्ताले अनुसरण गर्नुपर्ने बताउनुभयो ।
बरिष्ठ चलचित्रकर्मी तथा प्रतिष्ठानका संरक्षक चेतन कार्कीले लोक संस्कृतिको जर्गेनामा शेरचनको अतुलनीय योगदान रहेको बताउनुभयो । नेपाल उद्योग बाणिज्य महासंघका पूर्व अध्यक्ष आनन्दराज मुल्मीले स्वर्गिय शेरचनले लोक संस्कृतिको जर्गेनाको साथै समाज देखिएको विकृति विसंगित रोक्न निडर भएर उभिएको स्मरण गर्नुभयो ।
पर्यटनविद तथा संस्थाका सल्लाहाकार झलक थापाले कल्याण शेरचन पोखरालाई कलाको माध्यमबाट सिर्गाने कलाकार भएको बताउनुभयो । प्राज्ञ तथा बरिष्ठ लोक गायिका हरिदेवी कोइरालाले शेरचन बहु आयामिक व्यक्ति हुनुहुन्थ्यो भन्नुभयो ।प्रतिष्ठानका अध्यक्ष क्याप्टेन पूर्णबहादुर गुरुङ ह्याल्मोको अध्यक्षतामा भएको थियो ।
