काठमाडौँ – राष्ट्रिय प्रजातन्त्र पार्टीले संवैधानिक राजसंस्था र जनताबाट प्रत्यक्ष निर्वाचित प्रधानमन्त्रीको व्यवस्था हुनुपर्ने विषयलाई चुनावी घोषणापत्रमा समावेश गरेको छ ।
उक्त घोषणापत्रमा राष्ट्रनिर्माता पृथ्वीनारायण शाहको जन्मदिनको स्मरणमा पुस २७ गते राष्ट्रिय एकता दिवस मनाउने र नेपाली परिवेश सुहाउँदो मौलिक प्रजातन्त्र कायम गर्ने विषयलाई समेत समेटिएको प्रवक्ता भुवन पाठकले जानकारी दिए ।
मुलुकमा सनातन धर्मसापेक्ष हिन्दूराष्ट्र कायम गरी सम्पूर्ण धर्मबीच समानता र पूर्ण धार्मिक स्वतन्त्रता कायम गरिने तथा आर्थिक वृद्धिदरमाथि लैजान १५ वर्षभित्र पर्याप्त रोजगारी सिर्जना गरी वैदेशिक रोजगारमा जाने जनशक्तिको अन्त्य गरिने घोषणा पत्रमा उल्लेख छ ।
यसैगरी घोषणा पत्रमा वीर–अस्पताल सरहका अस्पताल नयाँ संरचनाअनुसार सातै प्रदेशमा स्थापना गरिने, आगामी १० वर्षभित्र १० हजार मेगावाट विद्युत् उत्पादन गर्ने योजना कार्यान्वयन गरी सदाका लागि विद्युत्भार कटौतीको अन्त्य गरिने तथा उच्चस्तरीय छानबिन न्यायिक आयोग गठन गरी अवैध रुपमा कमाएका सम्पत्ति जफत गर्ने र विभिन्न व्यक्ति एंव समूहद्वारा विदेशमा लुकाइएका कालोधन फिर्ता ल्याई राष्ट्र निर्माण उपयोग गरिने उल्लेख छ ।
पार्टीले आर्थिक गतिविधि रोक्ने खालका नेपाल बन्दजस्ता कार्यक्रम कदापि नगर्ने, आत्मसमर्पणवादी चिन्तनबाट कमजोर बनाइएको राष्ट्रियताको संरक्षण गरिने, काठमाडौँ–हेटौंडा जोड्ने सुरुङमार्ग, काठमाडौँ–जुम्ला जोड्ने राजमार्ग, काठमाडौँ बाहिरी चक्रपथ, तराई मधेसको मेची महाकाली हुलाकी राजमार्ग, मध्यपहाडी राजमार्ग, काठमाडौँ तराई द्रुतमार्ग, मेचीकाली विद्युतीय रेलमार्ग, कोशी तथा नारायणी नदीमा जलमार्गजस्ता यातायातको सञ्जाल निर्माण गरिने घोषणा पत्रमा उल्लेख छ ।
त्यसैगरी उद्योग तथा व्यवसायको विकासका लागि विभिन्न भागमा विशेष आर्थिक क्षेत्र स्थापना गरी १० वर्षसम्म ब्याज, कर, विदेशी विनिमय लगायतका विषयमा विशेष र आतिरिक्त सुविधा सहुलियत प्रदान गर्ने तथा त्यस्ता क्षेत्रमा ट्रेड युनियन खोल्न प्रतिबन्ध लगाउने, हडताल गर्न नदिने र राष्ट्रिय सुरक्षा, एकता तथा अखण्डताको संरक्षण गरिने घोषणापत्रमा उल्लेख छ ।
नेपाली काँग्रेस लोकतान्त्रिक गठबन्धनसंग सहकार्य गरेको सो पार्टीबाट प्रतिनिधि सभा सदस्यका लागि पाँच तथा प्रदेश सभा सदस्य निर्वाचनका लागि २० जनाले उम्मेदवारी दिएको छ ।
एराप्रपा र नेका (बिपी)बीच सहमति
एकीकृत राष्ट्रिय प्रजातन्त्र पार्टी (राष्ट्रवादी) र नेपाली काँग्रेस ९बिपी०ले चाँडो एकता गरी राष्ट्रवादी प्रजातान्त्रिक धारलाई संस्थागत गर्ने निर्णय गरेको छ ।
दुवै पार्टीले संयुक्त रुपमा आज आयोजना गरेको पत्रकारसम्मेलनमा एकीकृत राष्ट्रिय प्रजातन्त्र पार्टी (राष्ट्रवादी)का अध्यक्ष डा प्रकाशचन्द्र लोहनीले मुलुकको राष्ट्रियता कमजोर बन्दै गएकाले राष्ट्रवादी चरित्र बोकेका संस्था र राष्ट्रवादी शक्तिबीच एकताको खाँचो रहेको बताए ।
उनले आफ्नो पार्टीको वैचारिक दृष्टिकोण र नेपाली काँग्रेस (बिपी)को आदर्श निकट रहेकाले सो पार्टीसँग चाँडो एकता गर्न लागिएको जानकारी गराए ।
देशमा विधिको शासन कायम हुन नसक्दा अहिले भ्रष्टाचार र राजनीतिमा अपराधीकरण बढेको धारणा उनले व्यक्त गरे ।
नेपाली काँग्रेस (बिपी)का सभापति हरिबोल भट्टराईले नेपाली काँग्रेसले बिपीको चिन्तनलाई छाडेका कारण नयाँ पार्टी स्थापना गरिएको बताउँदै राजसंस्थाको विषयमा आफू मौन बस्ने तर अन्य विषयमा एराप्रपा (राष्ट्रवादी)सँग एकता गरी राष्ट्रवादी प्रजातान्त्रिक गठबन्धन निर्माण गर्ने सहमति भएको जानकारी दिए ।
एराप्रपाले काठमाडौँ क्षेत्र नं १ मा प्रतिनिधि सभा सदस्यका उम्मेदवार एवं नेका (बिपी) का सभापति हरिबोल भट्टराईलाई सघाउने तथा नेका (बिपी)ले समानुपातिक निर्वाचन प्रणालीमा एराप्रपालाई सघाउने सहमति भइसकेको सो अवसरमा जानकारी गराइयो । रासस
