राजाराम पौडेल,पोखरा – पुर्वप्रधानमन्त्रि एवं एमाले अध्यक्ष केपी शर्मा ओलीले देशको बारेमा सोच्ने पार्टी एमाले मात्रै भएको दावी गरेका छन् । नेकपा एमाले कास्कीले शुक्रबार पोखरामा आयोजना गरेको जनसभालाई सम्बोधन गर्दै उनले देशका बारेमा सोच्ने पार्टी एउटामात्रै छ त्यो हो एमाले उनले भने –‘पहिले कांग्रेस थियो अहिले एमाले मात्रै छ ।’ पहिला काँग्रेस देशभक्त पार्टी थियो, अहिले झाडीमा सिङ अल्झेको बाह्सिङ जस्तै हलचल गर्न नसक्ने भएको छ । ‘पहिले कांग्रेस देशको बारेमा सोच्ने पार्टी थियो तर अहिले बुढो बाह्रसिङे भएको छ,’ उनले भने, ‘झाडीमा सिङ अल्झेको बाह्रसिङे हलचल गर्न सक्दैन कांग्रेस पनि त्यही हो ।’
ओलीले कांग्रेसलाई के गर्ने भन्ने थाहा नहुँदा देशले दुःख पाएको आरोप लगाए । उनले आईजीपी, अख्तियार, लोकसेवा आयोग लगायतका संवैधानिक अंगका प्रमुख लगायत प्रमुख पद खाली छन् तर सरकारले नियक्त गर्न नसकेको बताए ।
ओलीले काँग्रेस सभापति शेरबहादुर देउवाले आफनै जिल्ला अनि आफनै क्षेत्रको आइजीपी हुनुपर्ने अडान लिएर न्यायालयमा हस्तक्षेप गर्न खोजेको बताए । उनले भने, ‘अब देशको प्रधानमन्त्री हुने, प्रमुख पार्टीको प्रमुख मान्छेले आफनो जिल्ला मात्रै हेर्न थालेपछि कसरी हुन्छ ?’
कांग्रेसले केन्द्रीय समितिको बैठकबाट सर्वोच्च अदालत विरुद्ध प्रस्ताव पास गरेर न्यायालयमाथि आक्रमण गरेको समेत ओलीले आरोप लगाए । उनले भने, ‘लोकमानविरुद्ध निर्णय भयो भनेर अदालतविरुद्ध नै खनिनुपर्ने आवश्यकता थिएन ।’ माओवादी केन्द्रको बारेमा भने आफूले कुनै टिप्पणी गर्न नचाहेको उनले बताए ।
‘माओवादीको बारेमा केही भन्नुपर्छजस्तो मलाई लाग्दैन,तपाईहरु जानकार हुनुहन्छ ।’ उनले भने । ओलीले नेपाली जनतालाई अझै अधिकारसम्पन्न बनाउन संविधान संशोधन गर्न सकिए पनि नेपालको हितलाई नोक्सान हुने गरि गर्न नसकिने बताए ।
कार्यक्रममा विभिन्न पार्टी परित्याग गरी १ हजार ३ सय ३७ जना एमालेमा प्रवेश गरे ।
