टर्कीको इस्तानबुलमा एक फुटबल रङ्गशाला नजिक भएको बम बिस्फोटमा कम्तीमा ३८ जनाको मृत्यु भएको छ । बिष्फोटमा १ सय ६० भन्दा बढी घाइते भएका छन् । प्रहरीमाथि लक्षित गरी एउटा कार बम तथा एउटा आत्मघाती बम विस्फोट भएको टर्कीका आन्तरिक मामिला मन्त्री सुलेमान सोइललाई उद्धृत गर्दै बीबीसीले जनाएको छ ।
इस्तानबुलस्थित बेसिकटस रंगाशालाबाट फुटबलप्रेमीहरु निस्किएको दुई घण्टापछि त्यहाँ नजिकै पहिला बम हमला भएको र लगत्तैपछि गोली चलेको प्रत्यक्षदर्शीहरुले बताएका छन्।टर्कीका मुख्य शहरहरुमा हालै भएका हमलाहरुमा दर्जनौं मानिसहरुले ज्यान गुमाइसकेका छन्।
यो पछिल्लो हमला कसले गरेको भन्ने कुनै समूहले बताएका छैनन् तर यो वर्ष टर्कीमा कुर्द लडाकु र इस्लामिक स्टेट भनिने विद्रोही समूहले बम हमलाहरु लहरै गर्दै आएका थिए।विष्फोट इस्तानबुलस्थित बेसिक्तास रंगशाला नजिक भएका हो ।
