काठमाडौं / गैरआवसीय नेपाली संघ (एनआरएनए) का पदाधिकारीहरुले विश्वमै छरिएका नेपालीहरुको चाहना समृद्ध नेपाल भएको बताएका छन् ।
एनआरएनका अध्यक्ष शेष घले नेतृत्वको टोलीले बुधवार सञ्चारग्रामस्थित महासंघको कार्यालयमा महाससंघका अध्यक्ष डा महेन्द्र विष्टसहितका पदाधिकारीसँग गरेको छलफलमा समृद्ध नेपाल निर्माणका लागि संचारकर्मीहरुको भूमिका पनि महत्वपूर्ण हुनेमा जोड दिए ।
एनआरएन प्रतिनिधिमण्डलले पेसागत सुरक्षा र व्यावसायिक दक्षता अभिवृद्धिबारे जिज्ञासा राखेको थियो । नेपाली पत्रकारिताको समसामयिक विषय, व्यावसायिक पत्रकारितालाई प्रभावकारी बनाउन दुई संस्थाबीच के-कस्ता विषयमा कसरी साझेदारीकासाथ अघि बढ्ने भन्नेबारे पनि छलफल भएको थियो ।
सञ्चार जगतको सकारात्मक भूमिकाले आफूहरुलाई सधैं प्रेरित गरेको उल्लेख गर्दै एनआरएन आईसीसी अध्यक्ष शेष घलेले नेपाली पत्रकारहरूको छाता संगठन महासंघ र एनआरएनएको सम्बन्ध सधै सुमधुर बनाउनुपर्नेमा जोड दिए । त्यस्तै एनआरएनएका संस्थापक अध्यक्ष डा. उपेन्द्र महतोले नेपाली सञ्चार क्षेत्रको विकासको सह्राना गरे ।
यस्तै, एनआरएनएका निवर्तमान अध्यक्ष जीवा लामिछानेले पत्रकारहरूको भूमिकालाई सम्मान गर्दै एनआरएनएबाट पत्रकारिता क्षेत्रको विकासमा पत्रकार महासंघसँग सहकार्य गरेर अघि बढ्ने बताए ।
महासंघका अध्यक्ष डा. महेन्न्द्र विष्टले नेपाली मिडिया व्यावसायिक विकासको चरणमा रहेकाले सबैको साथ र सहकार्य आवश्यक रहनेमा जोड दिए ।
नेपाल पत्रकार महासंघ युके शाखाको समन्वयमा भएको कार्यक्रममा एनआरएनएका उपाध्यक्ष टीबी कार्की, मध्यपूर्व संयोजक चन्द्र रोका, पूर्व प्रवक्ता डा. जुगत भूर्तेल लगायत विभिन्न देशका प्रतिनिधिको सहभागीता रहेको अनलाईनखबरले जनाएको छ। ।
